Yara na karun sa kustodiya sang Cadiz City Police Station ang ginakabig nga suspek sa pagpatay sa 16 anyos nga estudyante sang Villacin National High School sa Brgy. Tinampaan syudad sang Cadiz kahapon sang aga.
Ginkilala ang biktima kay April Bacato residente sang Sitio Sisoy Brgy. Cabahug sa amo nga syudad.
Sa interview sang Bombo Radyo Bacolod kay Police Lt. Col. Gil John Despi, nagpadulong ang pamilya sang biktima sa Cadiz City Police Station agud nga magpablotter matapos wala na ini nakapauli.
Nahibaluan nga nagpractice sang saot ang biktima sa eskwelahan kag ginbilin lang ini sang iya mga classmates sa bangga pasulod sa ila puluy-an.
Suno kay Despi, wala sang nagabiyahe nga habal habal pasulod sa balay sang biktima gani ginalakat niya lang ini sa pihak sang duha ka kilometros nga kalayuon sang balay nila nagikan sa bangga.
Ginlakat lamang sang biktima bangud nadula ang kwarta sini nga inugpamasahe.
Alagyan sang biktima ang balay sang ginakabig nga suspek gani posible nga nakita niya ini nga nagalakat sang isahanon gani napaminsaran ang malain nga tinutuyo.
Makaligad ang tatlo ka adlaw may nagtawag sa ila nga concerned citizen nga nakita ang bangkay sang biktima nga nagalutaw sa suba kag nasulod sa sako apang wala na sang pang idalom nga panapton.
Gilayon man ini nga ginpadulungan sang mga kapulisan kag natumod man sang pamilya nga ang nasapwan amo man ang nadula nila nga bata.
Ginpahayag sang hepe sang Cadiz City Police Station nga sang ginpadulungan sang imbestigador ang lugar kun sa diin natabo ang krimen narecover malapit sa balay sang ginakabig nga suspek ang cellphone sang biktima kag panapton sini samtang narekober man sa balay sini ang anum tubtob pito ka pulgada nga kutsilyo nga may dugo pa kag ginapahayag nga ini ang ginagamit sa pagpatay sa biktima.
Napaidalom na ang bangkay sang biktima sa post mortem examination kag nakita nga may kapin onse ka pilas sa nagkalain-lain nga lawas si Bacato kag nakita man nga nagbato pa ini sa suspek.
Ginalantaw nga ginhimuslan ang biktima bangud wala na sang pang-idalom nga panapton sang nasapwan ang bangkay sini.
Posible man nga kahapon lang gindala sa suba ang bangkay sang biktima bangud kun sang Biyernes pa gin-anod na ini sang tubig.
Ginalantaw man sa motibo sa pagpatay sang ginatudlo nga suspek sa biktima ang kilala niya ini kag sang iya pamilya.
Nagapadayon pa ang imbestigasyon sang kapulisan sa syudad sang Cadiz agud matumod kun may yara pa sang iban nga suspetsado sa pagpatay sa biktima.
