Lauman nga indi pa matapos ang finalization sang Code of Conduct (COC) sa ginaagawan nga kadagatan sa Southeast Asia, kalakip ang West Philippine Sea, sa idalom sang chairship sang Pilipinas sa subong nga 49th Association of Southeast Asian Nations Summit (ASEAN).
Ini ang ginabanta matapos sa masunod nga ASEAN summit sa Singapore sa 2027.
Sa press briefing sa International Media Center, ginpaathag ni Foreign Affairs Secretary Maria Theresa Lazaro nga kalakip sa mga kabangdanan sang pagka-delay ang magkatuhay nga panan-aw sang napulo ka pungsod nga miyembro sang ASEAN, kasubong man sang China, nga co-chair sang COC kaupod ang Malaysia.
Kalakip pa diri ang posibilidad nga kinahanglan pa sang pila ka mga pungsod nga ipaapruba sa ila kongreso ang nasambit nga kasugtanan.
Nauna na nga ginpahayag sang tiglikom nga yara na sa 80 percent ang nahuman na sa kasugtanan nga may katuyuan nga magtukod sang mga pagsulondan agud malikawan ang tensyon kag komprontasyon sa ginabaisan nga kadagatan.
Dugang pa sang tiglikom nga kun nahatagan lamang ang Pilipinas sang dugang nga lima tubtob anum ka bulan, posible nga natapos na ang kasugtanan sa idalom sang pagpamuno sang Pilipinas sa Summit.
Apisar wala na-finalize ang COC, ginpahayag ni Lazaro nga ini ang ginakabig gihapon nga kadalag-an sang Pilipinas bangud humalin sa 50 percent, ini ang naglab-ot na sa 80 percent.












