Ginpahayag sang majority bloc sang Senado nga suportado nila ang ginaduso ni Senate Finance Committee Chairperson JV Ejercito nga kakason sa proposed 2027 national budget ang mga kwestyonable nga mga alokasyon nga posible halinan sang korapsyon, suno kay Sen. Panfilo “Ping” Lacson.
Suno diri, nagaisa ang mga senador sa pag-usisa sang proposed national budget agud masiguro nga makakas ang mga alokasyon nga wala sang supisyente nga basehan kag mahimo magamit sa korapsyon.
Pahayag ni Lacson, indi lamang ang pagkakas sang mga kwestyonable nga alokasyon ang katuyuan sang pag-usisa kundi ang pagsiguro man sang transparency sa bug-os nga proseso sang paghimo sang national budget.
Ginhatagan man pagtamod ni Lacson nga wala dapat mangin eksepsiyon sa maid-id nga pagtsekyar sa mga pondo sang gobyerno.
“All means all,” suno sa senador, nga nagakahulugan nga tanan nga makaduluda nga alokasyon ang dapat ma-usisa anuman ang ginhalinan ukon sin-o man ang posible nga maka-benepisyo diri kalakip na ang mga proyekto nga mahimo maangot sa mga personalidad nga malapit sa presidente.
