Halos P1 million nga balor sang suspected shabu ang narecover sa isa ka bodegero sa drug buybust operation nga ginpatigayon sa Prk Cereza South, Brgy. 3, Bacolod City alas-6:44 subong nga aga.
Ang subject person ang ginkilala nga si Bryan Ganancial alyas jenjen, 23 anyos, single, wala sang trabaho kag residente sa lugar.
Ang operasyon ang ginpangunahan sang City Drug Enforcement Unit sang Bacolod City Police Office, kabulig ang City Intelligence Unit kag Bacolod Police Station 2.
Narecover sa iya ang duha ka knot tied transparent plastic bag kag lima ka heat-sealed transparent plastic sachet sang suspected shabu kalakip na ang buybust item.
Ini ang ginabanta nagabug-at sang 140 grams, nga may standard drug price nga P952,000.
Sa interview sang Bombo Radyo Bacolod kay Bacolod CDEU Head Police Lt Col Albert Sy, pila ka semana man ang ila surveillance sa subject tubtob natigayon ang madinalag-on nga drug buybust operation.
Ini ang wala sa listahan sang barangay anti-drug abuse council (BADAC), kag wala paman nakaagi nga naaresto.
Ang iya area of operation ang nakasentro sa Brgy 3 kag mga kaingod sini nga lugar.
Ginatumod pa kun ang source sini sang supply ang parehas sa ginakuhaan sang nakaligad nga mga naaresto.
