Nainquest na kahapon ang ginapahayag nga lider sang Epogon robbery group nga nadakpan sa banwa sang Cauayan sang Domingo sang hapon.
Sa interview sang Bombo Radyo Bacolod kay Police Major Lowell Garinganao, hepe sang Cauayan Municipal Police Station, ginpahayag sini nga nagapabilin sa kustodiya sang Cauayan MPS ang suspetsado nga si Francisco Epogon kag napasaka na ang kaso angot sa illegal possession of explosives matapos nga makuhaan sang pineapple grenade sang ini ang gin-aresto sa balay sang iya kahagugma sa Barangay Isio, Cauayan.
Suno kay Garinganao, sa tion nga pasakaan sang kaso ang suspetsado kun mapamatud-an nga ang grupo ang may kahimuan sa pagpangawat sa balay kag pagpatay sa foreign national sa Villa Angela, Subd., Brgy. Villamonte, Bacolod City sang tinalikdan nga semana, magaagi na ini sa regular filing.
Ginpahayag man ni Garinganao nga padayon pa ang paghulat sang mga ini sang mga tawo nga nabiktima sang suspetsado nga makapadulong sila sa estasyon agud magfile sang reklamo.
Padayon naman ang manhunt operation sang kapulisan sa mga kaupod ni Francisco nga nalakip sa warrannt of arrest nga nauyatan sang Cauayan Police.
Nagpanawagan man ang hepe sa mga pumuluyo nga nabiktima sa pagpanghold-up sang grupo nga indi magkahadlok sa pagpasaka sang reklamo batok sa mga ini.
