Ginamonitor pa sang mga kapulisan kun sa diin nagapanago si La Castellana Sangguniang Bayan member Donato ‘Natnat’ Dumaguit.
Nahibaluan nga ang SB Member ang isa sa suspect sa Philippine National Police (PNP) Recruitment Scam kun sa diin gintanyagan ang mga biktima nga segurado nga makasulod sa hanay sang kapulisan kabaylo sang P250,000 tubtob P300,000 kun sa diin nagdangat sa 43 ang ila nabiktima.
Una na nga nadakpan ang duha ka mga police personnel gikan sa Bacolod City Police Office (BCPO) nga imbulbado sa recruitment scam nga gilayon man nga nagbail kag sang damlag lang, naaresto man si Mary June Delos Santos, ang ginatudlo nga mastermind.
Sa interview sang Bombo Radyo Bacolod kay Police Major Rhonj Darrell Nigos, hepe sang La Castellana Municipal Police Station, wala pa sang indikasyon kun magabayad sang bail si Delos Santos, nga nagapangatubang sang kaso nga 12 counts sang estafa.
Pahayag ni Nigos nga sila ang nakabatun na sang tip kun sa diin nagapanago ang SB member nga gilayon nga nadula kag ginpalos na sa Municipal Council matapos nga wala na nakapakita sa mga session matapos ang insidente.
Pasalig sang hepe nga iga-implementar sang mga ini ang layi sa tion nga magpagwa na sang warrant of arrest ang korte.
Paathag ni Nigos nga ang mga ini ang hatagan man sang tyansa nga makapangita ang abogado agud magdepensa sa ila.
