Tag-iya sang salakyan mismo ang nagpalos sang royda sang SUV Fortuner sa kilid sang dalan sa Barangay 8, Bacolod City.
Ini kasunod sang paglapta sa social media sang pagpalos sang royda sang salakyan, nga nagtuga sang alarma bangod sa pagpinsar nga ginapangahuyan sini ang salakyan sang iban.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, ang tag-iya sang rent-a-car service ang ginkilala nga si Glendel Depasucat.
Sang makita niya ang post, gilayon ini nga nagpablotter sa Bacolod Police Station 2 agud maklaro ang iya pangalan.
Suno diri, gin-arkilahan sang ginkilala nga si Alyas Joel, residente sang Cavite ang salakyan sang Hulyo 4.
P2,500 ang daily rental sa salakyan, apang sang Hulyo 18 wala na nakabayad si Joel kag indi na macontact.
Pinaagi sa GPS tracker, ginpangita sini ang lokasyon sang salakyan kag natumod nga ara lamang sa kilid sang dalan sa Brgy 8.
Ginalantaw ni Tolentino nga hungod ginbilin sa area ang salakyan bangod wala na sang ibayad.
Indi man sini madala ang salakyan bangod sarado kag ang yabi ang yara sa nagrenta.
Sa kahangawa nga balikan ni Joel ang salakyan kag liwat nga tabanon, ginpalos sini ang apat ka royda.
Ginsuma man sang tag-iya ang balayran sang nagrenta nga sa karun nagdangat na sa P37,500.
