Ginreklamo ang pagconstruct sa punong nga ginatampokan sang duta sa Barangay Pahanocoy, sa ciudad sang Bacolod, bangod sa lutak nga galapta sa dalan.
Suno kay Punong Barangay Yolanda Noble, ikaapat na sini nga ginpatawag ang tatlo ka contractor agud sturyahan ang problema.
Suno diri, una na sini nga ginapatawag ang contractor bangod nakita sini ang posible nga problema, apang liwat sini nga gin-atubang ang mga contractor bangod sa problema sang mga pumuluyo nga nagalapta ang lutak sa dalan nga delikado sa mga nagalabay.
Ginpa-untat anay sini ang construction apang liwat naman nga nangin problema ang lutak sa dalan kag amo man nga liwat sini nga ginpa-untat ang pagtampok sang duta sa punong.
Suno kay Noble, ang kapin sa pito ka ektarya ng duta ang plano nga himuon nga commercial lot kag nagpaathag ini nga wala nagapamatok ang barangay para sa development sang ciudad apang ginalantaw man sini ang sitwasyon sang mga pumuluyo.
Pahayag sini, luyag lamang niya nga limpyohan ang mga truck antes pa man pagwaon sa dalan agud wala sang lutak.
Samtang nagpasalig naman ang contractor nga sila ang magahimo sang tikang agud wala sang may mahalitan sa ila trabaho.
Suno kay Dina Delos Santos, isa sa mga contractor, mabutang sila sang signages, kag antes mag-exit ang mga trucks sa area, ila ini limpyohan agud wala sang lutak nga maglapta sa dalan.
Nagpangayo ini sang pasaylo sa mga naperwisyo sang ila trabaho kag nagpasalig nga hatagan sang solusyon ang problema agud malimpyo ang dalanon kag malikawan ang aksidente.
