Nasapwan ang bangkay sang isa ka lalaki nga nasulod sa sako kag ginapatihan gin-salvage sa National Highway, Sta. Monica Subdivision, Barangay Tabigue banwa sang EB Magalona kaina sang kaagahon.
Ginkilala ang biktima kay Luke Fuentes, 54-anyos kag residente sang Purok Lampirong, Barangay 2, Bacolod City.
Sa interview sang Bombo Radyo Bacolod kay P/Capt. Wilfredo Benoman, hepe sang EB Magalona Police Station, ginpahayag sini nga may nagpahibalo sa ila kaina sang kaagahon nga may yara sang nasapwan nga bangkay nga nasulod sa sako sa amo nga lugar.
Gilayon naman ini nga ginkadtuan sang mga pulis agid nga makumpirmar.
Suno kay Benoman, may yara sang karton sa tupad sang bangkay kun sa diin may nakasulat nga “pusher ako, tularan nyo nang malaman nyo”.
Dugang pa sang hepe nga nagagwa sa physical investigation sang Scene of the Crime Operatives sang Negros Occidental Police Provincial Office nga may yara sang multiple gunshot wounds sa ulo kag lawas si Fuentes.
Magluwas diri, gin-utod pa ang nawala nga ‘index finger’ sang biktima kag nakabaklid pa ini kun sa diin ang iya tiil ang may yara sang higot nga alambre.
Nagapati naman si Benoman nga sa iban nga lugar ginpatay si Fuentes kag ginwigit lang ini sa EB Magalona.
Isa sa ginalantaw nga motibo sa pagpang-salvage amo ang isyu angot sa iligal nga druga.
Sa karon, padayon pa ang imbestigasyon sang kapulisan sa insidente.
