Hugot nga ginakondenar ni President Ferdinand Marcos Jr. ang gintawag sini nga absurd nga mga polisa sa ginapropose nga implementasyon sang sex education sa pungsod.
Nagpabutyag sang kahangawa ang Presidente sa pila ka mga provisions sa Senate Bill 1979 nga suno diri, nagaunod sang “woke” elements nga indi appropriate para sa mga kabataan.
Suno kay Marcos, sang weekend, nabasa sini ang Senate Bill 1979 kag nakibot ini bangud sa pila ka mga elemento.
Suno sa iya, ang tanan nga “woke” nga luyag nila dal-on sa systema sang pungsod kaangay sang kinamatarong sang isa ka bata nga magtesting sang nagkalain-lain nga sexualidad ang makabig nga kaladlawan kag makasuluka.
Ini ang indi nagakadapat sang kun ano ang sexual kag sex education nga itudlo sa mga kabataan.
Gin-athag sang Presidente nga nagapati ini sa sex education kag importansya sini, partikular na sa mga terms sang pagtudlo sa mga kabataan sang anatomy sang reproductive systems, konsekwensya sang early pregnancy kag ang pagtaas sang kaso sang Human immunodeficiency virus (HIV).
Suno diri, kinahanglan nga itudlo ang mga ini agud makahibalo ang mga kabataan apang ang ginlakip nga mga “woke” absurdities ang wala sini ginakompormihan.
