Ginahulat nalang sang grupo sang mga taxi drivers nga aprubahan ang ginproposed nga P10 nga dugang sa flagdown sang taxi.
Sa interview sang Bombo Radyo Bacolod kay Mario Eusebio, secretary general sang Taxi Operators sang Negros Occidental (TONO), may yara na sila sang petition sa Land Transportation Franchising and Regulatory Board (LTFRB) sa pagdugang P10 sa flag down sa taxi kag kun magnubo man ang presyo sang gatong mahimo man gilayon makakas ang dugang nga flag down gani indi na kinahanglan magcalibrate sang metro.
Suno kay Eusebio, mas mabudlayan sila nga mga taxi operators kun indi pagpadayunon ang dugang sa flagdown bangud tuman na kataas ang ginsaka sang gatong.
Suno diri ang kaangay nga adjustments natabo man sadto apat na katuig ang nakaligad kasunod man sang pagsaka sadto sang presyo sang gatong.
Suno diri ang P10 nga dugang ang ginabanta man nga indi man matam-an ang pasahero kag makabulig man sa mga taxi drivers.
Ginpahayag man ni Eusebio nga tubtob sa karun nagahulat pa sila sang fuel subsidy bangud wala pagid sila nakabaton tubtob sa karun.
Samtang ginpahayag man sang isa ka driver sang jeep nga kuntani idirekta nalang ang subsidy sa mga fuel stations agud nga tanan ang makabenepisyo.
Sa interview sang Bombo Radyo Bacolod sa driver nga si Paterno, nagabiyahe sang Handumanan-Libertad, indi man sila makapasaka sang pamasahe sa pihak sang asod-asud nga pagsaka sa presyo sang gatong bangud apektado man ang mga pasahero.
Suno kay Paterno, wala pa sila nakabaton sang fuel subsidy humalin sadto gani ginapangabay nalang sini nga ang subsidy ang ibutang nalang sa mga fuel stations agud nga tanan nga mga pumuluyo ang makabenepisyo.
