Nagpasalig ang Branch Manager sang ginareklamo nga overseas employment agency, nga gina-asikaso nila ang request sang utod sang overseas Filipino worker (OFW) nga yara sa Saudi Arabia, kag indi matuod ang mga alegasyon batok sa ila.
Madumduman nga sang Domingo, nagdangop sa Bombo Radyo Bacolod si Jeny Villanueva Bibangco sang Bago City, bangod sa gina-alegar makapila na sini nga pagbalik-balik sa HIBA International Inc. sa pag-ayo nga mapanugyan sa employer sang iya magulang nga si Jona Villanueva Calamro nga ini ang mabaklan sang cellphone.
Ini bangod humalin sang Mayo indi na makacontact ang iya magulang matapos maguba ang cellphone kag sila ang nagakabalaka kag halos indi makatulog.
Nakabatun man ang mga ini sang impormasyon gikan sa isa pa ka OFW nga kaupod sang ila magulang nga nagtawag ang agency sa employer sini kag naghambal nga indi baklan sang cellphone kag indi swelduhan ang empleyado.
Kahapon, nagdangop mismo sa Bombo Radyo Bacolod si Hazel Borja, Branch Manager sang HIBA International Inc. kag nagkompirmar nga nagpadulong gid man sa ila si Bibangco kag ila ini nga gincater.
Indi naman matuod nga tatlo ka semana na ini nga nagabalik-balik, sa baylo makaduha lamang ini mag-atubang sa ila, kag ginpa-estorya naman nila sa head office sa Manila.
Panindugan sini nga gina-asikaso nila ang request sa employer kag ini ang nagreply na kahapon nga nagapasalig nga sa masunod nga payroll, didto na ibuhin ang igabakal sang cellphone.
Paathag ni Borja nga indi mahapos ang magkuha sang cellphone sa Saudi Arabia bangod may polisa ang pungsod nga isa lamang ka numero sa kada tawo, gani madamo pa sang kinahanglan iproseso.
Indi man makabakal personal ang domestic helper bangod wala ini sang iqama gani ini ang indi makagwa.
Pahayag sini nga ang reklamo ang nag-ugat bangod luyag ni Bibangco nga padasigon ang paghatag sang cellphone, apang sila ang dapat maglabay sa nagakaigo nga proseso.
Dugang pa nga may nagasulsol diri kag nagahatag sang sala nga impormasyon nga nagapapanic pa sa complainant.
Pasalig sini nga indi matuod nga nagtawag ang agency sa employer kag nagpahayag nga indi baklan cellphone kag swelduhan ang empleyado bangod ini ang bayolasyon sa kontrata.
Ginapasalig man sini nga maayo ang sitwasyon sang OFW, kag sila ang padayun man sa monitoring.
