Nakuha ang pila ka sachet sang supected shabu sa ginarentahan nga balay nanday Jennifer Galve, iloy ni Pearl Joy Galve kag stepfather nga si Rene John Nasis alias Negro sa Purok A.C. Yulo, Barangay Sum-ag, Bacolod City.
Sa interview sang Bombo Radyo Bacolod kay Police Captain Michael Tuburan, station commander sang Bacolod Police Station 9, sila ang gincontact ni Janna Portoza, pakaisa ni Pearl Joy matapos makakita sang anom ka sachet sang suspected shabu sa sulod sang cabinet.
Suno diri, siya ang ginsugo sang iya tiya nga magtsekyar sang hinalay, kag sa pagbukas sa cabinet nga bayu-an didto sini nakit-an ang mga suspected shabu.
Ang mga narecover nga suspected shabu ang ginabanta nagabug-at sang 30 gramos kag may standard drug price nga P200,000.
Ang mga suspected shabu ang napadala na sa crime laboratory para sa eksaminasyon.
Suno kay Tuburan, indi pa matumod kun kay Negro ang nasambitan nga ginapatihan illegal nga droga.
