Patay ang ginasuspetsuhan nga kawatan matapos gina-alegar naluthangan sang gwardiya sa Korean Dormitory sa tunga sang 17th kag 18th Lacson Street, Barangay 5, Bacolod City alas-4:20 kaina sang aga.
Ang biktima ang wala pa makilal-an, samtang ang gina-alegar nakaluthang nga gwardiya ang ginkilala nga si Rengie Librado, 40 anyos, single, residente sang Sitio Tres, Brgy Inolingan, Moises Padilla.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, ginapahayag sang gwardiya nga ginatuyo sang biktima nga gub-on ang glass door sang dormitoryo.
Ini ang ginsaway sang gwardiya, apang gilayon nga nagdalagan palagyo ang biktima, gani ini ang iya gintiro.
Apisar sini, nakataklas pa sa pader ang biktima kag nakatabok sa pihak samtang si Librado ang nagtawag naman sa Bacolod Police Station 2.
Sa pagresponder sang kapulisan, ang biktima ang nakadalagan pa sang kapin 30 metros gikan sa ginlumpatan nga pader antes ginbawian sang kabuhi.
Sa examination sang Scene of the Crime Operation, may pilas ang biktima sa ilok, apang wala pa gindeterminar kun ini ang gunshot wound bangod wala man sang exit wound.
Kun ini gid man ang igo sang bala, mahimo nga yara pa ini sa lawas sang biktima.
Gnsurrender naman sang gwardiya sa kapulisan ang iya armas-luthang kag ini ang natalana nga ipaidalom sa ballistic examination.
Sa karun ginahulat pa ang final report gikan sa SOCO agud matumod kun gunshot wound gid man ang ginkamatay sang biktima.
Ginasuspetsuhan sang mga tawo sa palubot nga ang napatay amo ang suspect sa asod-asod na nga mga kaso sang pagpangawat sa nasambitan nga dormitoryo.
Ini man ang rasun kun ngaa hugot ang pagbantay sang mga gwardya sa area.
Suno kay Tolentino, nakahunong sa ila ang gwardiya apang kung wala sang may nakaclaim gilayon nga pamilya, buy-an nila ang gwardiya matapos ang reglementary period.
