Ginatos ka libo kag kalabanan mga turista ang nagtipon sa New York Times Square sa New York, USA agud masaksihan ang sikat nga New Year Ball Drop.
Sa interview sang Bombo Radyo Bacolod kay Ludovico Baqueriza III, Bombo International News Correspondent derekta sa New York City, New York, USA, apisar nga may mga nauna na nga pamahog, ginapakamaayo nga napatigayon sang matawhay ang selebrasyon.
Pahayag ni Baqueriza nga kinahanglan maglabay sa malawig nga pila antes makasulod sa Time Square kag ginasarado ang bilog nga block sa palibot sini.
Alas-2:00 palang sang hapon, ginasarado na ang venue gani dapat temprano pa ang pagpila bangod ginaregulate lamang ang numero nga makasulod.
Samtang sa tion nga yara na sa sulod, indi naman mahimo nga maggwa tubtob matapos ang Ball Drop.
Ginadumulian man ang backpack kag makahulubog nga ilimnon sa pagsulod sa venue.
Suno kay Baqueriza, nag-umpisa sang 1905 ang pagpatigayon sang Ball Drop kag ini ang nakilala worldwide bangod ang New York City ang ginakabig man nga “crossroad of the world” kag ginapadulungan sang madamo nga tawo gikan sa nagkalainlain nga pungsod.
Sa pihak nga bahin, may nanarisari man nga fireworks display nga ginapatigayon sa Central Park kasubong man sa mga hotels.
Paathag sini nga ginapahanugutan ang pagpatigayon sang fireworks display sa pila ka mga lugar sa New York apang ginadumilian naman ang mga firecrackers.
Matapos ang ball drop, iban sa mga tumalan-aw ang nagabalik na sa tagsa ka hotel apang may-ara man sang mga nagapadulong sa mga bars kag restaurant nga nagapatigayon sang parties.
May-ara man sang midnight marathon sa Central Park kasunod sang Ball Drop.
Si Baqueriza, nga isa ka nurse ang apat ka beses naman nga nakatambong sa New Year’s Countdown sa New York Times Square, apang sa subong nga tuig, ginpili sini nga magselebrar sa pamilya sang iya abyan nga kaangay nga Ilonggo.
Sila ang nagahanda man sang mga regular nga ginahanda sa lamesa sang mga Pilipino sa Media Noche kaangay sang lechon, caldereta, lumpia, pancit kag salad, nga ginapangita man sang pila sini ka abyan nga Americans.
Suno kay Baqueriza, nanarisari ang paagi sa pagselebrar sang New Year sa New York, depende sa lahi sang mga pumuluyo.
Ang Enero 1 ang holiday sa New York, apang balik naman sa regular nga opisina sa Enero 2.
