Ginatos ka mga grilling kiosks kag food cart ang iplastar sang Bacolod Gugma Foundation Inc. sa palibot sang Bacolod City Public Plaza kag Bacolod City Government Center para sa MassKara Festival 2025.
Sa press conference, Martes, ginpahayag ni Christopher Mallo, head sang Food Kiosk Operations Management pagausaron ang dalan Gatuslao, Gonzaga kag San Juan sa Plaza kun sa diin 101 ka mga grilling kiosks ang iplastar samtang may masobra 40 ka food cart ang ipahamtang sa dalan Rizal.
Suno kay Mallo, P25,000.00 pesos ang renta sa Plaza para sa 10 feet by 10 feet nga pwesto kalakip na diri ang kuryente para magbaligya sa sulod sang 19 ka adlaw halin Oktubre 1 tubtob 19.
Suno kay Mallo,sa bahin sang Plaza, ila ipatuman ang polisa nga kapin duha ka kiosko ang kuhaon sang negosyante bangud kis-a indi ma akomodar ang mga customer sang isa lamang ka pwesto samtang lima ka kiosko ang maximum.
Ginpasiguro ni Mallo, nga may yara sang entertainment, banda, kag mga kalingawan sa Plaza sa sulod sang 19 ka adlaw nga MassKara Festival kag luyag mabalik ang kasadyahan sa sini nga festival site.
May gintalana nga tatlo ka adlaw nga preparasyon sa pagtukod sang kiosko sa Plaza antes ang MassKara.
Pagadumilian naman sang foundation ang pagbaligya sang ukay-ukay sa Plaza.
Ipatuman sa gihapon ang no backpack policy sa Plaza.
Nahibaluan nga ibalik sa Plaza ang pag anunsyar sang mga nagdaog sa MassKara street dancing and arena competition.
Sa Bacolod City Government Center, ginpahayag ni Mallo, may yara 180 ka mga pwesto para sa food carts kag dry goods.
Bukas na ang foundation sa pag akomodar sang mga interesado nga negosyante nga luyag magbaligya sa Plaza kag BCGC nga festival sites.
