Masobra 500 ka mga konsumidor ang nagpadulong sa Antonio L Jayme Elementary School sa Barangay Mansilingan, Bacolod City agud makigbahin sa plebisito sa Joint Venture Agreement sa tunga sang Central Negros Electric Cooperative kag More Power.
Nahibaluan nga ang Barangay Mansilingan ang may pinakamadamo nga populasyon sang mga konsumedor nga nagadangat sa 11,756 gani may yara sang napulo ka mga precinct sa nasambit nga buluthuan.
Suno kay Jose Taniongon, coordinator sa plebisito, masobra 500 ka mga botante ang nagpadulong kaina sang aga sa eskwelahan agud magboto.
Suno sa iya, kun may yara sang reklamo, sila ang nagaverify sini.
Suno kay Taniongon, masami nga mga complaints amu nga wala sa masterlist ang isa ka miyembro gani ila ini ginalista kag ginapaverify sa ila opisina sa Mabini Street.
Kun nakumpirmar nga sila ang miyembro, pagatawgan lamang ang konsumedor kag hambalon nga sarang ang mga ini nga makaboto sa masunod nga schedule.
Suno diri, dapat lamang nga magdala sang bill kag identification card ang konsumedor kag yara sa masterlist ang iya pangalan agud nga makaboto.
Gin-athag naman ni Atty. Mary Jude C. Marvel, chairman sang District Plebiscite Committee nga kun yara sa abroad ang tag-iya sang bill, sarang ini nga makapaproxy apang mangin mabudlay ang proseso bangud dapat notarized ang form.
Suno sa iya, available kag downloadable man ang proxy form sa Facebook page sang CENECO.
Samtang, kun ang konsumedor ang may duha ka balay sa nagkalain-lain nga barangay, isa lamang ka boto sa gihapon ang pahanugutan.
Suno diri, dapat lamang nga hibaluon sini kun diin nga masterlist nakabutang ang iya pangalan agud didto siya makaboto.
