Sa pihak sang wala untat nga pag-ulan halin kaina sang aga, ginatos gihapon sang mga nagaplano nga magpadalagan sa Barangay kag Sangguniang Kabataan elections sa Oktubre 30 nga nagfile sang Certificate of Candidacy kadungan sang una nga adlaw sang filing subong nga Agusto 28.
Pila sa mga kandidato ang nagsugod na sa pagpila sa Robinsons Place Bacolod alas-4:00 pa lang kaina sang kaagahon agud nga makauna sulod sa mall nga amo ang ginpili sang Commission on Elections bilang venue.
Sa interview sang Bombo Radyo kay Bacolod City Election Officer Atty. Kathrina Trinio Cana, ginlauman nila nga madamo ang magafile sa una nga adlaw sang filing bisan malain ang panahon bangud sa bagyo.
Suno kay Cana, gincluster per barangay ang filing sang COC agud nga mas madasig ang flow sang pagbaton sang COC.
Sang tinalikdan nga eleksyon, isa lang ka pila ang nagafile sang COC.
Suno sa election officer, nagadevice sila sang system nga mas madasig bangud nakadepende man ini sa desisyon sang local Comelec office.
Ginpabalik naman ang COC nga mga may indi manami nga quality sang picture nga gintapik.
Mas madasig naman para sa mga nagpacheck na sang ila nga COC sang tinalikdan nga semana bangud nalantaw na nga daan kun wala na diri sang kulang kag kun ano ang dapat ligwaton.
Ang mga nagfile sang COC ang ginpapirma man sa Integrity Pledge.
Ang tanan nga COC nga nafile halin kaina sang aga ang iga-encode sang Comelec staff kun magtakop ang filing alas-5:00 subong nga hapon.
