2,894 na lamang ka mga individual ang nagpabilin sa evacuation center sang Hinobaan kun sa diin ang iban diri ang nakapauli na sa tagsa ka mga panimalay matapos mag-evacuate ang mga pumuluyo bangod sa madamol nga pag-ulan dala sang Bagyo Betty.
Sa interview sang Bombo Radyo kay Guidralyn Lastrilla, Social Welfare Officer 1 sang Hinobaan, bangod nangin maayo na ang tiyempo kahapon sang hapon, iban sa mga evacuees ang nagdesisyon nga magpauli kagab-i kapin alas-6:00 tubtob alas- 7:00 sang gab-i.
Sang Sabado, Mayo 27 pa lamang, nagpadulong na ang mga pumuluyo sa evacuation center.
Sa masobra 3,000 ka mga evacuees gikan sa nanari-sari nga barangay, sa karun yara na lamang sa 2,894 ka mga indibidwal ukon 743 ka pamilya ang nagpabilin sa evacuation center.
Ang mga evacuees ang nagikan sa Barangay Alim, Barangay 1 ukon Poblacion, Bacuyangan, Po-ok, Bulwangan, Asia, Daug kag Sangke.
Suno kay Lastrilla, ila naman ginpahibalo ang mga pumuluyo nga bantayan ang dalagan sang panahon kag kun may yara sang pag-ulan nga kinahanglan nga mag-evacuate, bukas sa gihapon ang evacuation center para sa ila.
Wala naman sang problema sa pag-assist sa mga evacuee bangud sila ang nahatagan sang mga foodpacks kag ginpadulungan sang doktor agud matsekyar ang mga pamatyag sang kada isa kag mahatagan sang bulong.
