Magapadala sang ginatos ka mga police personnel ang Bacolod City Police Station agud magbulig sa pagbantay sa selebrasyon sang Ati-atihan Festival sa Kalibo, Aklan kag Dinagyang Festival sa Iloilo.
Sa interview sang Bombo Radyo Bacolod kay Bacolod City Mobile Force Company Head Police Lt. Col. Ronnie Brillo, magareport na sa Police Regional Office 6 ang 193 ka mga police personnel nga i-augment para sa isa ka semana nga selebrasyon sang Ati-Atihan Festival kag ginalantaw nga sa Martes ang ila send-off ceremony.
Suno kay Brillo, ang mga personnel ang ginkuha gikan sa 10 ka mga Police Station sa ciudad sang Bacolod kasubong man gikan sa BCPO Headquarters.
Ginpasalig naman sini nga apisar sa mga ipadala, indi maapektuhan ang field, intelligence kag iban pa nga mga operasyon sang tagsa ka mga Police Stations bangod ang BCPO ang may kabug-usan nga masobra isa ka libo nga mga police personnel.
Ginpahanumdom man sini nga wala ginapahanugutan sa pagdala sang kaugalingon nga motorsiklo ang mga kapulisan, sa baylo, sila ang idul-ong kag sugaton sa ila nga area of operation.
Ini ang ginmando agud malikawan ang kaangay nga hitabo sa Bacolod Masskara Festival kun sa diin isa ka pulis nga gindeploy ang nagbyahe papauli sa sur nga bahin sang ciudad matapos ang duty kun sa diin ini ang naaksidente kag nadulaan sang kabuhi.
Matapos ang Ati-Atihan Festival, ang mga gindeploy nga kapulisan ang gilayon man nga makabalik samtang ang BCPO ang liwat naman nga magapadala sang panibag-o nga batch sang 141 ka mga police personnel para sa augmentation sa Dinagyang Festival sa Iloilo nga maga-umpisa Enero 21 tubtob 28.
