Gindemolish ang ginatos ka mga tapangko nga nahamtang sa atubang sang Bacolod City Libertad Public Market kahapon.
Suno kay Anthony Torrecampo, residente sang Barangay Taculing, kag nagabaligya sa Amelia Street, Libertad Public Market, nag-umpisa ang pagpangguba alas-9:00 kahapon sang aga.
Ginkatingala naman sang mga market vendors ang hinali nga pagpahalin sa ila bangod sila ang una naman nga ginhambalan nga sarang lang makabaligya sa lugar.
Bangod sa pagpahalin sa ila, isa sa karun sa palamangkutanon sang mga vendors ang kun diin sila magapwesto ilabi na nga ini ang 15 ka tuig naman nga nagabaligya sa gwa sang merkado.
Kalabanan sa mga ini amo ang wala nakakuha sang pwesto sa sulod sang Annex Building, kun sa diin nagdangat sa 200 ang mga wala sang numero sa Amelia Street, luwas pa sang mga vendors sa Amelia Street ukon sa bagsakan.
Suno kay Torrecampo, sila ang ginpahalin matapos mag-abot ang mga back hoe nga gamitun para sa road widening program sang Department of Public Works and Highways (DPWH).
Nahibaluan nga ginsarado na sa mga salakyan ang nasambit nga dalan para sa patigayunon nga construction.
Apang sa pihak sina, padayun nga nagapanawagan ang mga vendors nga sila ang hatagan sang konsiderasyon kag pahanugutan sa pagbaligya sa atubang sang Libertad Public Market.
