Naaresto na ang ginatudlo nga suspect sa recruitment scam sa banwa sang La Castellana diri sa Negros Occidental kun sa diin ang mga luyag magsulod sa Philippine National Police ang mga biktima.
Ini ang ginkilala kay Mary June Delos Santos.
Madumduman nga pila ka mga indibidwal nga nagikan sa banwa sang La Castellana ang nagpadangat sang reklamo sa Bombo Radyo Bacolod matapos nga sila ang nascam ni Delos Santos matapos nga ginpabayad sila sang pila ka libo ka pesos kag ginpasalig nga makasulod sa Philippine National Police bisan wala sila sang tinapusan.
Kadam-an sa mga biktima ang nagpamaligya pa sang mga kasapatan kag duta agud lamang nga may ibayad kay Delos Santos agud nga madasig makasulod sa PNP.
Sa interview kay Police Major Rhonj Darrell Nigos, hepe sang La Castellana Municipal Police Station, nag-upod mismo si Police Regional Office 6 Director Brigadier General Jack Wanky agud nga maserbe ang warrant of arrest kay Delos Santos nga gin-issue sang La Castellana Municipal Trial Court.
Siya ang naaresto sa Barangay Carida, sa banwa sang Tapaz, Capiz sang Hunyo 14.
Suno kay Nigos, antes pa man ginserbe ang warrant of arrest sa kaso nga estafa ukon swindling, nakabaton sila sang impormasyon kag naverify man gani natumod kun sa diin si Delos Santos.
Ginpahayag sini nga ang pagserbe sang warrant of arrest ang joint operation sa pagpanguna man ni Police Regional Office 6 Director Brigadier General Jack Wanky, Capiz Police Provincial Office-Provincial Intelligence Unit, Tapaz Municipal Police Station, Negros Occidental Police Provincial Office-Provincial Intelligence Unit kag La Castellana Municipal Police Station.
Nagdangat sa 12 tanan ka mga warrant of arrest ang naserbe kay Delos Santos kag lunsay sa kaso nga estafa, pito ang ginserbe sa Capiz samtang ang lima sa banwa sang La Castellana, apang may yara pa nga waiting nga warrant of arrest nga igaserbe sa iya.
Suno kay Nigos, 43 tanan ang mga nabiktima nga ginpabayad sang P250, 000 tubtob P247, 000 gani nagdangat sa masobra P10 million ang nataban nga kwarta.
P180,000 naman ang piyansa sa tagsa ka warrant kaso nga ginapangatubang ni Delos Santos apang wala ini nakabayad.
Suno diri, ginatun-an pa sa karun kun mahulog sa kaso nga large scale estafa ang kaso nga ginapangatubang sini.
Sa karun si Delos Santos ang nakahunong na sa La Castellana Municipal Police Station.
