Nalab-ot sang naghugpong nga mga transport group ang ila tinutuyo nga maparalyze ang pampubliko nga transportasyon sa ginpatigayon nga rally-protesta nga nag-umpisa subong nga adlaw.
Ang Negros United Transport Coalition nga mga miyembro sang Kabakod Negros Transport Coalition Incorporated (KNETCO) – PISTON, United Negros Drivers and Operators Center (UNDOC) – PISTON, Bacolod Alliance for Commuters, Operators and Drivers Incorporated (BACOD) – MANIBELA, grupo sang consolidated jeepneys kag Kilosang Mayo Uno (KMU) ang nagtingob sa apat ka mga rally centers.
Ini ang ginalakipan sang Libertad Extension malapit sa Bacolod Police Station 6, Bangga Patio sa dalan Burgos, Magsaysay flyover kag Bata flyover
Alas-3:00 sa hapon sila ang magapatigayon sang transport caravan kag magatingob sa Bacolod City Government Center.
Luyag nila makapatigayon sang dialogo kag mahibaluan ang tindog sang local government unit sa pagbasura ni President Ferdinand ‘Bongbong’ Marcos Jr. sa Senate resolution nga nagapanawagan sang suspension sang Public Utility Vehicle Modernization Program.
Sa interview sang Bombo Radyo Bacolod kay KNETCO President Lilian Sembrano, madamo sang nagkalastranded bangod sa ginpatigayon nila nga rally-protesta, apisar pa nga may mga eskwelahan nga nagdeklarar na nga wala sang klase.// Ini ang pamatuod nga indi masarangan sang modernized jeepneys ang pagcater sa mga commuters
Aminado man ini nga may nagluntad nga gamay nga komosyon sang aga, bangod sa panawagan nga dakpon ang mga wala sang permit.
Apang pasalig sini nga peaceful protest ang ila nga ginapatigayon.
Ginpanindugan sang naghugpong nga grupo sang mga transport group nga 100 porsyento nila nga naparalyze ang transportation sector sa pila ka mga routa.
Sa interview sang Bombo Radyo Bacolod kay Bacolod Alliance for Commuters, Operators and Drivers Incorporated President Rudy Catedral, ginlibot nila ang apat ka rally centers nga ginlakipan sang Libertad Extension malapit sa Bacolod Police Station 6, Bangga Patio sa dalan Burgos, Magsaysay flyover kag Bata flyover.
Panindugan sini nga nalab-ot nila ang 80 porsyento nga pagkaparalisa sang transportasyon bangod ang nagabyahe lamang amo ang pipila lamang nga modernized jeepney units.
Pahayag ni Catedral nga 100 porsyento sang mga traditional jeepney units nga may routa nga Handumanan, Taculing, Mansilingan kag Murcia ang nag-upod sa ila nga kawsa sa pagpakig-away sa palpak nga Public Utility Vehicle Modernization Program.
100 porsyento man nga naparalisa ang byahe sang traditional jeepneys sa ciudad sang Silay kag Talisay.
Sa interview sang Bombo Radyo Bacolod kay Rodolfo Gardose, presidente sang United Negros Drivers and Operators Center (UNDOC) – Silay/Talisay, may ara lamang sang 140 ka traditional jeepney units sa nasambitan nga lugar kag wala pa sang modernized jeepneys.
Pinaagi sa ila nga pagsugilanon sa mga drivers kag operators sa terminal, napahangop sang mga ini nga ang kawsa ang agud sila ang indi madulaan sang palangabuhian.
