Ginaklaro sang DepEd nga wala sang dapat nga kahangaw-an ang mga ginikanan sa pagpasulod sa mga kabataan sa mga eskwelahan nga gingamit bilang quarantine facility center sa siyudad.
Suno kay Bacolod City DepEd School Division Superintendent Gladys Amylaine Sales, naintindihan sini ang ginakabalaka sang mga ginikanan.
Apang gindugang sini nga kaangay sa mga ospital, may protocol man ang mga eskwelahan nahanungod sa disinfection.
Ginaseguro sini nga antis ipagamit sa mga kabataan, natinluan na ini, kaangay sa disinfection nga ginahemu sa mga ospital.
May ara naman sang duwa ka eskwelahan nga nagamit na bilang quarantine facility.
Ini ang Abes-1 Elementary School, nakagraduate na ang nauna nga naka isolate diri, kag may panibag-o naman nga ginsulod, ang Graciano Lopez Jaena Elementary School, apang naisaylo na sa pension house nga ginkuntrata sang OWWA, kag ang Medalla Integrated School.
Samtang may duwa naman nga ginalantaw nga pagahemuon man nga quarantine facility center.
Samtang may mga pagpatuman man sa pagbalik sa eskwelahan, kaangay sang “no mask no entry”, kag dapat man nga pagahandaan sang eskwelahan ang paghatag sang facemask sa mga estudyante nga wala sini.
Ginapaabot man nga dapat may-ara sang 2 ka facemask ang mga estudyante agud nga mabulos-bulos sa aga asta sa hapon.
May pagpatuman man angot sa pagsulod kag paggwa sang mga kabataan agud nga indi mag ginutok, kag iga schedule lang ang paggwa sang kada section.
Ginakalipay man ni Sales nga bag-o paman ang COVID-19 pandemic, nakapatindog na ang mga ini sang wash area sa mga eskwelahan bilang proyekto.
Nagpatigayon ini sang WINS ukon Wash In School program, kag pagadugangan nalang ang mga ini agud nga makaigo sa 10 ka estudyante sa 1 ka gripo.
Giyahan naman sang manunudlo ang mga estudyante sa pagsulod sa classroom, kag iga schedule man ang oras sang recess agud nga indi dulungan.
Nahibaluan nga 69 tanan ang mga eskwlahan nga sakop sang DepEd sa Bacolod, kag kabahin tanan nga mga manunudlo sa pagplanu sa tikang nga pagahemuon sa pagsugod sang School Year 2020-2021. Samtang, Aminado ang Department of Education nga diutay lamang ang handa para sa online classes sa tion nga gamiton ini nga paagi sang learning sa pagbukas sang klase sa School Year 2020-2021.
Suno kay Bacolod City DepEd School Division Superintendent Gladys Amylaine Sales, amat-amat sang mga ini lantawun ang sitwasyon kag kun nakahanda na ang mga kabataan sa liwat nga pagbalik sa eskwela.
Suno kay Sales, yara lamang sa 10% sang mga kabataan sa siyudad ang nakahanda na sa pagtuon pinaagi sa online, bangod sa indi tanan ang may access sa internet.
Samtang 30 porsyento naman sa mga manunudlo ang nakahanda sa amo nga programa bangod kinahanglan man sang mga ini ang nagakaigo nga gadget.
Suno kay Sales, maayo tani ini kung nadayun nga maimplementar sa siyudad ang public wifi.
Samtang, masyado naman nga madaku ang statistical requirements ang kinahanglan nga atubangon sang DepEd sa pag-atubang sa amo nga programa.
Ginalantaw naman nga pagatungaon nalang depende sa ikasarang sang estudyante ang pagtudlo.
Kun ipatuman ang online, pwede man ini mahemu nga offline kag igadownload nalang ang form, kag pwede man ang hard copy.
Ginalantaw man ang posibilidad sang blended learning ukon ang pagsamo sang pila ka paagi.
Samtang kung madayun naman ang pagbukas sang klase sa buluthuan, yara nalang sa 15 sa Elementary kag 20 para sa High School ang makasulod sa kada classroom.
Samtang nakahanda naman ang mga buluthuan sa siyudad sa pagbutang sang mga wash area nga sarang maka akumodar sang isa ka gripo sa 10 nga estudyante sa kabilugan nga eskwelahan.
Pagahatagan naman sang schedule ang mga ini kag duha nalang ka beses sa isa ka semana nga magasulod sa eskwelahan, samtang pagahatagan naman sang assignment nga sarang ma-ubra sa balay.
Ang assignment naman ang sarang nga maihatag pinaagi sa online ukon igadownload lang kag masabat offline, kag pwede man nga igahatagan sang hard copy kung wala ang mga ini ikasarang nga maggamit sang internet.
Igatudlo man sa mga manunudlo sa paggamit sang teknolohiya, agud nga mapatuman ang blended learning.
Ginklaro ni Sales, nga nagapanguna gihapon nga prayoridad ang seguridad kag ikaayong lawas sang mga kabataan kag mga school personnels.
