Desidido ang utod sang Negrense nga ginpatay sang iya live in partner kag ginhal-id sa Quarry Road, Binangonan, Rizal nga mapabayad sa prisuhan ang suspect.
Sa interview sang Bombo Radyo Bacolod kay Vabes Cahilig, utod sang biktima, ang ginpatay nga si Janiclear Cahilig amo subang sa ila walo ka mag-ulutod.
Pahayag sini nga ini ang nagaserbe nila nga tagapangapin kun may maghilabot sa ila kag ini ang wala nagapabaya sa ila ginikanan kag sa ila nga mga utod apisar nga ini ang may kaugalingon na nga pamilya.
Mabuot man nga tawo ang pagkakilala sini sa ila ginakabig na nga bayaw gani nakibot ini sa pagpatay sa ila magulang.
Panindugan ni Vabes nga dapat mabayaran sang suspetsado ang kasal-anan pinaagi sa pagkapriso.
Luyag sini nga indi na makagwa ang suspetsado sa prisuhan bangod indi naman sini mabalik ang kabuhi sang ila magulang.
Nagpasalig man si Vabes nga ila deparahon ang mga hinablos nga plano sang ila ginikanan nga papulion sa banwa sang Murcia.
Nahibaluan nga manug-uling ang ginikanan sang biktima.
Nagapanawagan man ang mga ini nga sila ang mabuligan agud mapapauli ang bangkay ni Janiclear sa Negros Occidental.
Sa pihak sini, ginpahayag naman sang iloy nga may duha pa ka utod si Janiclear nga yara man sa Manila, kag luyag sang mga ini nga papulion na lamang apisar nga sila ang mamigado, bangod sa trauma sa natabo sa ila subang.
