Ginkalipay sang ginikanan sang nadula nga detainee sa ciudad sang Bacolod nga ginpaboran sang Korte Suprema ang paghatag sang privilege of writ of Amparo angot sa pakadula sang bata nila nga si Henry Tayo Jr.
Si Henry ang nadakpan sang 2022 bangod sa pagpangawat kag gindetain sa Bacolod Police Station 8.
Bangod wala man sang may nagpasaka sang kaso kag natapos na ang reglementary period siya ang ginrelease.
Apang, humalin sadto wala na ini nakapauli pa tubtob subong.
Ginmandoan sang Supreme Court ang National Police Commission (NAPOLCOM) Region 6 nga magpatigayon sang ‘full blown investigation’ angot sa pagkadula sini.
Ang nangin tikang diri sang kapulisan amo ang pagkutkut sa apat ka unidentified nga mga bangkay nga ginlubong sa tatlo ka patyo para mahibaluan kun may magmatch sa DNA sample kag sa pamilya.
Ang police nga gindeklarar sang Supreme Court nga responsible kag accountable sa pagkadula ni Henry amo sanday anay Bacolod Police Station 8, station commander Police Lt. Col. Joery Puerto, ang investigator on case kag desk officer.
Sa interview sang Bombo Radyo kay Merlina Tayo, iloy ni Henry, sadto may isa ka pulis nga nakacivilian nga nagpadulong sa ila brgy para sturyahon ang complainant kag ang tanod nga onduty sang natabo ang pagdakop kay Henry.
Nagpadulong sila sa police station apang naghulat sila sang madugay kag ginpasalig nga irelease si Henry.
Sang gab-i na, sila ginhambalan nga ibilin lang anay si Henry samtang ang complainant naman kag ang tanod ang nagpauli na.
Suno sa iloy, nagapati ini nga nakahibalo ang kapulisan kun diin man sa karun ang iya bata.
Dugang pa sini, nagsalig pa naman ini nga yara sa safety si Henry bangod yara ini sa kustodiya sang kapulisan apang baliskad ang natabo.
Samtang, nagpahayag naman ang amay nga si Henry Tayo Sr, nga bisan negatibo pa ang resulta sa pagkutkut sa mga bangkay, iya ipapangita sa kapulisan kun diin na ang ila bata.
Suno diri, aminado sila nga nagagamit sang illegal nga druga ang ila bata kag sila mismo nalipay na kuntani nga mapreso ini para didto na lang sa presohan apang ang problema lang sa karun amo nga wala na ini nakit-an pa tubtob subong.
