Dako ang pagpasalamat sang amay ni Nicus Balagusa sa tanan nga nagpakig-unong sa ila nga pamilya.
Madumduman nga si Nicus Balagusa, 20 anyos, Grade 11 student ang ginsulod sa kwarto kag ginluthang sa atubang mismo sang iya mga ginikanan sang Hunyo 2 sang gab-i.
Ang suspect ang ginkilala nga si Carlito “Dondon” Tongho, amay sang 16 anyos nga babayi nga ginlugos sang duha ka abyan ni Nicus.
Ang suspect ang may apat pa ka kaupdanan kag sila ang lunsay ginpasakaan na sang kaso nga murder samtang ginpasakaan naman sang kaso nga rape ang 17 kag 19 anyos nga naghimulos sa menor de edad.
Sa interview sang Bombo Radyo Bacolod kay Eric Balagusa, nagdangat sa masobra 500 ang nag-upod sa pagdul-ong kay Nicus sa iya ulihi nga palahuwayan sa Greenhills Memorial Park kahapon sang aga.
Ginpasalamatan sini ang tanan nga nag-upod sa ila sa pangamuyo nga mahatag ang hustisya sa iya nga bata.
Samtang, nagapasalamat man ini sa kapulisan nga wala nagpabaya kag wala untat nga nagabulig sa ila.
