Kumporme ang isa ka ginikanan nga ibalik ang naandan na nga schedule sang klase nga nagasugod sa bulan sang Hunyo kag matapos sa bulan sang Marso ukon Abril agud matu-on ang sira klase sa tion nga mainit ang tiyempo.
Naimplementar na ang bag-o nga schedule sang klase sa Rizal Elementary School bangod sa tuman nga kainit kun sa diin half day na lang ang klase.
Sa interview sang Bombo Radyo kay Emily Probido, iloy sang kinder kag grade 2 student, ang kinder sini nga bata may bag-o nga schedule nga alas- 7:00 sang aga tubtob alas- 9:30 sang aga, samtang ang schedule naman sang grade 2 sini nga bata, alas- 6:30 sang aga tubtob alas- 12:00 sang udto.
Ginbutang sa aga nga schedule ang tanan nga klase nga gin-ugyonan sang mga ginikanan bangod nga kun ang klase yara sa hapon, tuman ang ka init sang tiyempo.
Apang, apisar nga ginbag-o na ang schedule sang klase suno kay Probido makaluluoy sa gihapon ang mga kabataan bangod nga gintingob sila tanan sa isa ka klase, gani sila nagagutok sa isa ka classroom.
Dugang pa nga duha lang ka electric fan may yara ang isa ka classroom, madamo sang mga estudyante ang nagamuno nga magin-ot kag ginabalhas bangod sa init.
Gani, ginapabalonan ni Probido ang kabtaan sini sang tubig, extra nga bayo kag kuyab.
Wala naman ginapilit nga mag-uniform ang mga estudyante, mahimo lamang nga maka-ilis sila sang bayo kun yara na sa classroom kag nakabatyag sang init basta naka-uniporme ini kun padulong pa lamang sa bultuhuan.
Para kay Probido, mas maayo kun ibalik ang naangdan na nga schedule sang klase kun sa diin masugod ini sa bulan sang Hunyo kag matapos sa bulan sang Abril ukon Mayo, ang bulan sang tig-ilinit para makapahuway ang mga kabataan, ginikanan kag manunudlo sa mainit nga tiyempo.
