Padayon pa sa karun nga ginapangita ang ginikanan sang lapsag nga lalaki nga nasapwan nga yara sa state of decomposition sa Barangay Alijis, Bacolod City kahapon.
Sa interview sang Bombo Radyo kay Police Captain Greeky Cayao, station commander sang Bacolod Police Station 7, sa bakante nga lote nasapwan ang lapsag nga may yara pa sang umbilical cord kag ginapatihan nga patay na sang ginbilin sa area bangud wala sang may nabatian nga hibi ang mga residente kag nadiskubrehan na lamang sang nagapanimaho na.
Ginpangita sang mga residente kun diin nagikan kag baho kag ila natukiban ang bangkay sang nasambit ng lapsag.
Suno kay Cayao, ginlibot nila ang area agud magpangita sang CCTV nga sarang nga makatumod kun sin-o ang nagbilin sang lapsag.
Samtang, pagatsekyaron naman sang barangay health workers ang mga iloy nga natalana nga magbun-ag subong nga semana agud matsekyar kun sin-o ang mga ginikanan sini.
