Desidido ang Bacolod City Police Office (BCPO) nga maduso nga mapasakaan sang kaso ang mga ginikanan sang mga menor de edad nga pasulit-sulit nga nagabayolar sa curfew for minors ordinance sa ciudad.
Sa interview kay BCPO Director Police Col. Joeresty Coronica, sa pag-implementar sang ordinansa, ang kapulisan ang naga-upod sa operasyon sang Department of Social Services and Development.
Panindugan sang BCPO Director nga indi pwede nga tubtob mintras magaserbe na lamang nga manugdul-ong sang mga kabataan ang mga kapulisan.
Pahayag ni Coronica nga ang mga kabataan nga maaktuhan nga yara sa gwa apisar nga curfew hours na ang ginadul-ong sang kapulisan sa ila puluy-an ukon ginaturn-over sa DSSD.
Apang madamo sa mga ini ang nagabalik-balik lamang sa pagbayolar, gani plano nila nga pasakaan sang kaso ang mga ginikanan nga nagapatumbaya sa ila mga kabataan.
Ini sa idalom sang Presidential Decree No 603 ukon ang Child and Youth Welfare Code.
Dugang pa sini nga indi tanan nga corner ang mabantayan sang kapulisan gani sila ang nagapangayo man sang bulig sang mga Barangay Tanod.
