Naanod nga tsinelas nga ginlagas sang mga menor de edad ang rason sa pagkalumos sang magtiyo sa suba sa Brgy. Mabini, Cadiz City alas-10:00 kahapon sang aga, Pebrero 17.
Ang mga biktima ang ginkilala nga si Jesus Sadia, 42-anyos kag ang hinablos sini ang menor de edad nga siyam ka tuig, lunsay residente sang Hda. Sampil sa nasambit nga barangay.
Sa interview sang Bombo Radyo Bacolod kay Cadiz City Disaster Risk Reduction and Management Office Head Mark Clinton Roa, magkaupod ang mag-tiyo kag isa pa ka menor de edad nga nagapamunit sang isda sang gin-anod ang isa ka tsinelas sang upod nila nga bata.
Ini ang ginlagas sang duha ka kabataan apang bangud sa mabaskog nga daludo sang tubig, naanod ang duha ka menor de edad.
Gilayon naman nga ginsalom ni Sadia ang isa ka menor edad kag natigayon niya ini nga naluwas.
Apang sa ikaduha nga pagsalom sini agud luwason ang isa pa niya nga hinablos, ang magtiyo ang nadala sang daludo kag wala na nakabutwa pa.
Ginhingagaw pa dala ang mga biktima sa ospital apang gindeklarar nga dead on arrival.
Ginpahayag naman nga wala sang foul play sa nasambit nga insidente.
