Ginkompirmar sang Negros Occidental Police Provincial Office (NOCPPO) nga may yara sang isa ka police personnel nga na-assign sa Candoni Municipal Police Station ang nag-positibo sa gin-patigayon nga random drug testing.
Sa interview sang Bombo Radyo Bacolod kay P/Lt. Abegeal Donasco, deputy spokesperson sang NOCPPO, ginpahayag sini nga sa lima ka mga pulis nga ginpaidalom sa random drug testing, ang wala ginhingadlan nga police corporal lang ang nagpositibo.
Nahibaluan nga makaduha ka bes na ini nga ginkuhaan sang confirmatory test apang positibo sa gihapon ang resulta.
Suno kay Donasco nga sang Disyembre 16, gin-papanaugan na sang order ang amo nga police agud nga i-relieve sa Candoni Municipal Police Station kun sa diin iya man gin-surrender ang iya nga issued firearms.
Pagrelieved sa Police Corporal, ginpadala ini gilayon sa Regional Personnel Holding and Accounting Unit (RPHAU) sa PRO-6.
Suno sa deputy spokesperson, ginhatagan ini sang 15 ka adlaw agud nga ichallenge kag pamatud-an ang resulta sang iya nga drug test kun sa diin sarang niya madala ang iya nga sample test sa iban nga government drug testing center.
Pananglitan nga mapamatud-an nga positibo sa gihapon ang iya drug test, pasakaan siya sang kaso nga grave misconduct kag iban pa gid nga kaso nga maka-padismiss sa iya sa serbisyo.
Sa karon suno kay Donasco, gina-enganyo sang PRO-6 director Brigadier General Rolando Miranda nga 100% sang NOCPPO personnel ang makapaidalom sa drug test.
Nahibaluan nga ang ini nga random drug testing ang mando man ni Miranda sang nagsugod siya pungko bilang regional director sang PRO6 sadtong Disyembre 1.
