May ginalantaw na nga motibo ang EB Magalona Municipal Police Station tuhoy sa kamatayon sang 19-anyos nga sultero nga gin-abduct sa nasambit nga banwa sang Lunes sang gab-i apang nasapwan-patay sa katubuhan sang Hacienda Newton, Barangay Malugo, Victorias City kahapon.
Sa interview sang Bombo Radyo Bacolod kay Police Capt. Wilfredo Benoman Jr., hepe sang EB Magalona PNP, may ginasundan na sila karon nga motibo apang indi pa nila mapalayag kun ano.
Apang, suno kay Benoman, bulan sang Disyembre sang nagligad nga tuig lamang nakabalik sa Hda. Carmelo, Barangay Sto. Niño si Roger Hellacone Jr. halin sa Manila.
19-anyos nga gin-abduct sa EB Magalona, nasapwan nga patay sa Victorias
Nagagwa sa inisyal nga imbestigasyon sang kapulisan nga may yara sang ginpalagyuhan nga atraso si Hellacone sa Manila.
Ila pa karon gina-imbestigaran kun courier ukon imbolbado sa iligal nga druga ang biktima.
Suno kay Benoman, magabuligay sila sang Victorias City Police Station agud masolbar ang kaso.
Madumduman nga gin-abduct si Hellacone sang mga suspetsado nga nagasuksok sang maskara samtang nagahampang ini sa computer shop sa Brgy. Tanza Proper pasado alas 8:00 Lunes sang gab-i.
Nasapwan na lamang ini nga patay kag may pilas sa ulo tuga sang pagkaluthang Martes sang aga.
