Ginkumpirmar sang commander sang Police Station 6 nga isa ka drug surrenderer sa idalom sang Oplan Tokhang ang negosyante nga Muslim nga gin-abduct kag nasapwan na lamang nga patay sa Purok Kasanag, Barangay Mandalagan ciudad sang Bacolod kahapon sang aga.
Muslim businessman nga gin-abduct sa Bacolod, nasapwan nga patay
Suno kay Police Captain Elmer Bonilla, tuig 2016 sang nagsungka sa idalom sang Oplan Tokhang ang biktima nga si Ontao Sacar, 64-anyos.
Sadto nga tion, sa Islamic compound sa Brgy. 31 pa naga-istar si Sacar.
Apang suno kay Bonilla, lain pa sang una ang commander sang police station sang nagsungka si Sacar kag santo sa ila nga rekord, matapos nga nagpaidalom sa Oplan Tokhang, nagsaylo na sa Brgy. Mandalagan si Sacar kag wala na sila sang ideya sa mga nangin aktibidad sini.
Madumduman nga alas-6:00 kahapon sang aga sang nasapwan ang biktima nga ginputos sang packing tape ang baba kag guya sang biktima, may nakasulat nga “I love drugs” sa iya nga tiyan kag may smiley pa kag nakita man sa iya tupad ang placard nga “Huwag tularan bigtime pusher ako”.
Una ini nga gin-abduct sang armado nga mga kalalakihan nga nakasakay sa pula nga van samtang sila ang nagalakat sang iya asawa, Lunes sang gab-i sa Mambuloc, Brgy. 10.
