26 tanan ang narekord nga napatay sang SouthWest Front sang New People’s Army sa probinsya sang Negros Occidental kag Negros Oriental.
Sa interview sang Bombo Radyo kay Brig. Gen. Jason Jumawan, commander sang 302nd Infantry Brigade, sang tinalikdan nga tuig 12 tanan ang napatay sang NPA kag subong nga tuig may tatlo sila ka indibidwal nga ginpatay.
Suno diri, humalin sang tuig 2024 tubtob 2026, 26 na tanan ang ila napatay nga ginalakipan sang mga barangay officials, sibilyan kag iban pa.
Nalakip sa ila ginpatay amo si Barangay Kagawad Ariel Calumboy sang Barangay Tambad sa banwa sang Cauayan kag siya amo ang chairman sang anti-communist group nga Sambayanan Negros-Cauayan chapter.
Suno kay Jumawan, padayon ang ila pagpressure sa rebelde nga grupo nga magsurrender na kag gin-athag sini nga nagapanguna nga trabaho sang militar amo ang pagprotekta sa pumuluyo.
Sa karun ang isa ka NPA nga napilasan sa engkwentro sa Cauayan sang Sabado ang naoperahan na kag siya pasakaan sang kaso sa pagwa sini sa ospital.
