Nangin matawhay ang ginpatigayon nga candle lighting sang mga supporters ni anay President Rodrigo Duterte sa Bacolod City Government Center Grounds kagab-i.
Sa interview sang Bombo Radyo Bacolod kay Police Major Elmer Bonilla, Station Commander sang Bacolod City Police Station 4, wala sang narecord nga untoward incidents kasunod sang pagtililipon sang madamo nga mga pumuluyo agud nga magsindi sang kandila agud magpabutyag sang suporta sa anay presidente nga gin-aresto sang Martes paagi sa pagserbe sang warrant of arrest nga ginpanaog sang International Criminal Court.
Suno kay Bonilla, ang kawsa sang pagtililipon sang mga indibidwal kag mga riders amo nga ipabutyag ang ila nga balatyagon sa pag-aresto sa anay presidente.
Suno diri, wala man sang narecord nga insidente sa ginpatigayon nga aktibidad.
Nangin matawhay man ang ginpatigayon nga motorcade sang mga riders nga nakigbahin man sa candle lighting.
Ang nasambit nga aktibidad ang ginpakigbahinan kapin 2500 nga mga pumuluyo sa ciudad sang Bacolod kag pila ka mga indibidwal nga nagikan sa pila ka banwa ukon nga ciudad sa probinsya sang Negros Occidental nga malapit lamang sa ciudad sang Bacolod.
