BACOLOD CITY — Ginpanginwala sang manunudlo nga si Emelyn Mercorio ang mga akusasyon ni Jose Ernie Buelos nga kaupod niya sa Paglaum Village National High School nga siya ang nagapanakit nga nagresulta sa pagkapilas sang lalaki sang sila ang mag-away kahapon sang hapon.
Sa pagpasabat sang Bombo Radyo, ginpahayag ni Mercorio nga indi matuod ang alegasyon ni Buelos sa natabo kahapon sa Puentebella Subdivision sa Barangay Taculing.
Natingala si Mercorio nga ara si Buelos sa subdivision nga indi man siya taga-diri.
Sa pagkamatuod suno sa maestra, tatlo na ka adlaw nga ginasunod-sunod siya ni Buelos tubtub nga nagtabuay ang ila banas kahapon.
Suno kay Mercorio, ginsakit siya sang maestro sa atubang sang iya anak kag 70 anyos nga tiya bisan nagapakitluoy na ang tigulang nga indi pagsakiton ang iya hinablos.
Ginkwestiyon man ni Mercorio ang pagka-lalaki ni Buelos bangud nasarangan sini nga magpatupa sa babayi.
Ginpanginwala man sini nga nakit-an sang 36 ka mga estudyante ang pag-inaway nila ni Buelos bangud sa gwa sang eskwelahan ang natabo.
Sa karon, nakapablotter na si Mercorio kag magapasaka naman ini sang kaso batok kay Buelos bangud sa kasakitan nga iya naagom.
Ang konflikto sa tunga sang duha ang madugay na nagsugod bangud suno sa iya sa mga patakaran sang eskwelahan kag sang bag-o nga principal.
