Patay ang anay empleyado sang 7G Tayco International Corporation sa Ceres Village, Purok Kasilingan 2, Barangay Mansilingan, Bacolod City matapos gintiro sang gwardiya sang ini ang nagpamilit nga magsulod sa establisyimento.
Suno kay Police Lt. Conrado Espino Jr., station commander sang Bacolod Police Station 7, ang biktima ang ginkilala kay Juvy Natividad Jr., 31 anyos.
Nagasakay sa motorsiklo ang biktima sang naglabay sa lugar sang nabungguan man sini ang isa ka persona nga naga-bike.
Nagtambay ini sa gwa sang 7G Tayco International Corporation tubtob nga nagpamilit nga magsulod sa establishimento.
Nabais sini ang security guard nga nagaduty nga ginkilala kay Antonio Inanuria, 25 anyos tubtub nga ini ang gintiro sang makatatlo ka beses gamit ang 12 gauge shot gun nga nagresulta sa iya kamatayon.
Gilayon nga nagpalagyo si Inanuria matapos ang insidente.
Panugyan ni Espino sa gwardiya nga magsungka nalang ilabi na nga wala man sang maistaran sa Bacolod bangod pangayaw ini sa lugar.
Nahibaluan nga stay-in lang sa kumpanya si Inanuria kag nagatrabaho sa Security Guard of Seniority Agencies nga nakabase sa Manila.
Ginpasalig naman ni Espino nga magapatuman sila sang follow up investigation agud nga matumod ang ginpadulunan sang suspetsado.
Ginpakigbahin naman ni Joseph Natividad, hinablos sang biktima nga ginpahibalo ang mga ini sang abyan nga kaupod sadto sa trabaho sang biktima nga si Juvy Natividad Jr. nahanungod sa pagluthang diri sang isa ka security guard.
Nagikan sa balay sang isa ka abyan si Juvy agud mag-inom-inom.
Ginalantaw man nga nakainom ini nga nagtuga sang iya pagkaaksidente kag pagbunggo sa isa ka naka-bike antes pa man sang natabo nga pagpangluthang.
Suno kay Joseph, nagpadulong ini sa iya man mismo ginatrabahuan sadto nga kompanya kun sa diin nagaoperate ini sang forklift.
Apang tatlo ka semana na ini nga naterminate bangod ginpasibangdan sa pagpangawat.
Nagahilibion naman nga ginsayasay sang iloy sini nga si Alma Natividad nga mabuot ang iya bata, wala nagakuha sang gamit nga indi iya kag wala nagaupod sa barkada.
Pahayag pa sini nga bisan ang mga kaupod sa trabaho sang bata ang nakahibalo nga ginatawgan ini ang anak kun wala pa makapauli pagpatak sang alas-5:00 sang hapon.
Dugang pa sini nga sa tanan nga empleyado ini lang ang gin-absorb sang kumpanya gani wala ini nagalaom nga halitan ang iya nga bata.
