Balik na sa pag-eskwela ang mga kabahin sa Girls Junior League Softball Team sang Bago City matapos nga makadaog sang third place sa Juinor Softball World Series 2022 sa Kirkland, Washington, USA.
Suno kay Josie Sebunga, ang head coach sang team, sa karun nagbalik na ang mga kabataan sa klase ilabi na nga duha man ka tuig nga wala sang face-to-face classes.
Ginapreparahan naman sang mga ini ang mahimo masunod nga tournament.
Pahanumdom ni Sebunga, nga importante sa mga players ang time management ilabi na sa tunga sang mga trainings kag agud indi man maapektuhan ang ila nga academics.
Ang mga kabahin sa Juniors League ang ginalakipan sang mga edad 13 tubtob 15 anyos nga kalabanan mga Grade 8 tubtob Grade 9 students.
Magluwas sa plaque kag medalya nga nakuha sa pahampang, ginakabig man nila nga reward ang makakadto sa America.
Samtang wala naman sila sang nangin gasto sa pagbyahe bangod ini ang ginsabat na sang Little League International.
Ginhatagan man ang mga ini sang P100,000 nga cash incentives sang Bago City government.
Samtang ginpasalamatan man sang coach ang tanan nga nagsuporta sa ila kabahin na ang Department of Education (DepEd) division of Bago City kasubong man ang pamilya sang mga atleta.
Dugang pa sini nga dako man ang pagsupporta sang Filipino community sa Washington sa akomodasyon sang naghampang ang mga kabataan.
Paathag ni Sebunga nga ang handom nila para sa mga kabataan amo nga magamit bilang stepping stone ang Softball agud nga makatapos sa pag-eskwela kag malab-ot ang mga handum sa kabuhi.
Suno diri, masami niya ginapahanumdom sa mga kabataan nga masami magpangamuyo kag ipabilin ang disiplina sa kaugalingon.
Pahanumdom man sini sa mga kabataan nga bisan ano ang mga upang, indi magpa-apekto bangod magabunga gid ang pagpangabudlay.
