Nagpanaug ang global oil prices samtang nagsaka ang stocks kahapon matapos temporaryo nga nag-untat sa pagpang-atake ang Estados Unidos batok sa Iran kag ginhatagan sang kahigayunan ang diplomatic negotiations sa duha ka pungsod.
Nagpanaug sang 6 percent ang presyo sang langis, matapos ang pila ka adlaw nga pagsaka tuga sang kabalaka nga maglala ang tensyon kag maapektuhan ang global oil supply.
Kadungan sini, nagsaka ang mayor nga stock indexes sa Estados Unidos.
Suno sa mga analyst, mahimo may epekto ang pagnubo sang oil prices sa presyo sang gasolina sa mga masunod nga adlaw.
Importante ang presyo sang crude oil bangud apektado diri ang kabug-usan nga presyo sang fuel.
Samtang, padayon nga ginabantayan ang sitwasyon sa Strait of Hormuz, isa ka importante nga shipping route para sa global oil supply.
