Indi pabor si Negros Occidental Governor Eugenio Jose “Bong” Lacson sa pagdula sang National Task Force to End Local Communist Armed Conflict (NTF-ELCAC).
Madumduman nga ginpropose sang isa ka United Nations special rapporteur ang pag-abolish sa counter-insurgency task force.
Ini kasunod sang pila ka mga reklamo natuhoy sa indi husto nga paggamit sang pondo sang gobyerno.
Apang panindugan ni Lacson, nga maayo ang resulta sang NTF-ELCAC sa probinsya kag ang tanan nga pondo nga gindagdag sa mga Barangay ang nakabulig gid agud mangin mas malinong kag ma-uswag ang tagsa ka lokalidad.
Suno diri, papel sang mga local government unit (LGU) nga maghatag sang 2nd chance sa mga miyembro sang Communist Party of the Philippines – New People’s Army (CPP-NPA) nga luyag magbalik sa sabak sang gobyerno kag pilion nga buy-an ang ila nga mga armas.
Pinaagi sa Local Task Force ELCAC, ginahatagan ang mga kumunidad sang livelihood projects kag financial assistance agud mapa-umwad ang ila nga lugar.
Gani indi makita ni Lacson ang rasun kun ngaa dapat untaton ang programa.
Suno diri, ang mahimo lamang nga factor agud untaton ang NTF-ELCAC amo ang ikasarang sang gobyerno nga suportahan ang programa.
Aminado ang gobernador nga may mga LGU nga mahimo nagkaproblema sa liquidation, apang suno diri sa Negros Occidental, halos tanan nga programa ang nangin madinalag-on magluwas lamang sa isa ka Barangay nga napilitan nga ibalik ang budget bangod nagkaproblema sa road right of way, sang ginakay-o kuntani nga dalan matapos nagpakatig-a ang tag-iya sang duta.
Paathag sini nga sa tion nga indi maliquidate ang proyekto sa nagakaigo nga timeline kag kun may nabilin nga budget, ini ang ginabalik gid sa National Government.
Nagapati si Lacson nga samtang nagapabilin ang pagpanghangkat sang rebelde nga grupo, dapat man nga ipadayun sang gobyerno ang pagreach-out sa mga ini, tubtob nga sila ang magdesisyon nga magbalik sa sabak sang gobyerno.
