Liwat nga nagpahanumdom ang gobernador sa probinsya sang Negros Occidental sa makawala nga grupo nga ang gobyerno ang handa nga magbatun sa ila kag sila ang pagabuligan sa pagbalik sa sosyodad.
Ini kasunod sang nagluntad nga engkwentro sa Sitio Apitong, Brgy Bi-ao, Binalbagan, Negros Occidental kun sa diin duha ka matag-as nga opisyal sang New People’s Army ang napatay.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, napamatud-an na sang madamo kun paano ang ginahimo nga pagtatap sa mga rebelde nga nagabalik sa sabak sang gobyerno.
Kadungan sa padayun nga pag-uswag sang probinsya, padayun nga gina-engganyo ni Lacson ang mga rebelde nga magpanaog na sa bukid kag buy-an na ang mga armas.
Pasalig sini nga nakahanda nga magbulig ang Provincial kag National Government sa mga magasurrender, paagi sa pinansyal kag livelihood programs.
Nagapabilin man ang proyekto sang gobyerno sa Enhanced Comprehensive Local Integration Program (E-CLIP).
Panawagan sang gobernador nga ikonsiderar ang panugyan agud maagom man nila ang parehas nga bulig nga ginhatag sa mga kaupdanan nila nga nauna na nga nagpanaog kag nagbalik sa normal nga pagpangabuhi.
Panugyan man ni Lacson sa mga may himata ukon kilala nga nagsulod sa makawala nga grupo, nga magbulig sa pag-engganyo nga ang mga ini ang magbalik na sa sabak sang gobyerno.
Ginlab-ot man sang Bombo News Team ang alkalde sa banwa sang Binalbagan.
Suno kay Binalbagan Mayor Emmanuel Aranda, siya ang nakaleave humalin kahapon.
Sang ginpangayuan sang mensahe sa mga pumuluyo nga malapit sa ginluntaran sang engkwentro, nagsabat ang alkalde nga nakahibalo na ang mga ini sang himuon.
Suno diri, yara man ang militar nga nagahatag sang abiso sa dapat himuon.
