Nagapati ang gobernador sang Negros Occidental nga isa sa pamaagi agud mapasaka ang presyo sang mill gate price sang kalamay amo nga untaton ang pag-import sang kalamay sa pungsod.
Naka-apelar na ang sugar council kay President Ferdinand Marcos Jr, sa mga mahimo nga tikang agud mauntat ang pagnubo sang mill gate price sang kalamay nga sa karun yara na lamang sa P2,400 ang presyo kada sako.
Bisan ang mga dalagko nga sugar planters ang nagareklamo na, apang mas makaluluoy pa gid diri ang magagmay nga sugar planters.
Gani ang sugar council ang nagapanawagan na sang intervention sang gobyerno.
Suno kay Governor Eugenio Jose Bong Lacson, dapat ang ano man nga plano nga pag-import sang kalamay, untaton na.
Pahayag ni Lacson, sadto manubo ang mill gate price apang sa karun nga madamo na sang nagmahal man kaangay sang abono, gasolina kag labor, manubo gid man ang mill gate price kag suno sa gobernador maapektuhan gid man ang mga mangunguma ilabi na ang small planters.
Sa karun ginalauman ni Lacson nga sa masunod nga tuig magtaas na ukon magbalik na sa husto nga presyo ang mill gate price sang kalamay.
