Ginpanugyan sang gobernador sa probinsya sang Negros Occidental nga pahanugutan na lamang nga makatipon sang nagakaigo nga pirma ang people’s initiative para sa ginaduso nga ammendment sang 1987 Constitution bangod ini ang mapatpat paman sa patogayunon nga plebisito.
Suno kay Negros Occidental Governor Eugenio Jose “Bong” Lacson, legal ang ginapalibot nga palapirmahan para sa people’s initiative kag kinamatarong na sang mga pumuluyo kun sila ang magapirma ukon indi.
Nahibaluan nga ginakinahanglan sang indi magnubo 12 porsyento nga pirma sang kabug-usan nga registered population sa Pilipinas ukon tres porsyento sang registered voters sa kada distrito antes mapahanugutan ang pagpatigayon sang plebisito kag madayun ang ginatuyo nga ammendment sa konstitusyon.
Pasalig ni Lacson nga sa plebisito, ang mga pumuluyo man gihapon ang magaboto ukon magadesisyon natuhoy sa ginaduso.
Apang aminado man ini nga dapat mapaathag man kun charter change ang ginadihon ukon ammendment lamang sang certain provisions.// Suno sa gobernador, mas maayo kun makatipon na lamang sang nagakaigo nga porsyento sang pirma agud madayun na ang madugay naman nga ginapanawagan para sa pagligwat sang kontituyon.
Apang suno kay Lacson, pabor gid ini kun sa economic provisions lamang nga ginaduso, apang wala pa ini sang may mahambal kun may dugang pa nga mga provisions nga luyag amyendahan.
