Ginadayaw ni Negros Occidental Governor Eugenio Jose “Bong” Lacson ang pagbawi ni Presidente Rodrigo Duterte ang iya mando nga nagapahanugot sa pagpatigayon sang dry run sang face to face classes sa Enero 2021 sa pila ka mga lugar matapos ang mga reports sang bag-o nga COVID-19 strain sa United Kingdom.
Madumduman nga sang Disyembre 14, gin-aprubahan ni Duterte ang proposal sang Department of Education nga magpatigayon sang face-to-face classes sa mga low risk areas.
Sa post Christmas meeting nga ginpatigayon sini kaupod ang Inter-Agency Task Force on the Management of Emerging Infectious Diseases kag mga eksperto, ginbawi sang Presidente ang nasambit nga mando kag indi pagpahanugutan ang face-to-face classes sa mga kabataan tubtob mangin preparado na ang pungsod.
Suno sa iya kinahanglan anay nga mahibaluan sang pungsod ang nature sang virus, ang SARS-CoV-2 VUI 202012/01 (Variant Under Investigation, year 2020, month 12, variant 01) nga ginapangatubang sa karun.
Sa interview sang Bombo Radyo Bacolod kay Lacson, ginpahayag sini nga mas maayo na nga ginsuspinder na nga daan sang presidente ang amo nga mando kag wala na naghulat pa nga makasugod ang dry run sang face-to-face classes sa 2021 bangud mas delikado ang bag-o nga variant sang coronavirus.
Luyag man sang gobernador nga mag-propose nga isuspinder man ang tanan nga mga sports activity para sa 2021 bangud suno kay Lacson, indi maka-sarang ang probinsya nga magpatigayon sang bubble games kaangay sa ginahimo sang mga sikat nga hinampang.
