Nagapati si Negros Occidental Governor Eugenio Jose “Bong” Lacson nga dapat magpatuman na sang travel ban indi lamang sa United Kingdom kundi pati na sa mga pungsod nga may yara sang kaso sang bag-o nga strain sang coronavirus.
Sa interview sang Bombo Radyo Bacolod kay Lacson, ginpahayag sini nga dapat maghimo sang adjustment ang pungsod kag magtuon sa naagyan sadto sang pagtuhaw sang COVID-19.
Suno sa iya, maathag nga may yara na sang problema sa UK kag iban pa nga European countries gani dapat nga magpatuman na sang travel ban.
Suno sa gobernador, wala man sang may mapierdi ukon madula kun magpatuman sang travel ban sang mas timprano.
Suno kay Lacson, pwede mapahanugutan ang pagpadulong sa UK apang indi gid dapat pagpahanugutan ang pagpasulod sang mga biyahero nagikan sa amo nga pungsod kag iban pa nga mga lugar nga may kaso sang bag-o nga strain sang COVID-19.
Naintindihan man sini nga ang pagpatuman sang travel ban ang maka-apekto sang turismo, apang suno sa gobernador, domestic tourism pa man lang subong ang amat-amat nga ginapahanugutan sa pila ka mga lugar sa pungsod.
