Satisfied kag nalipay si Governor Eugenio Jose “Bong” Lacson sa nangin performance sang Philippine National Police (PNP), Philippine Army kag Philippine Drug Enforcement Agency (PDEA) subong nga tuig.
Kahapon, nagpatigayon sang Joint Fourth Quarter Meeting sang Provincial Peace and Order Council (PPOC) and Provincial Anti-Drug Abuse Council sa Capitol Social Hall nga ginpangunahan sang gobernador.
Ginpresentar ni 303rd Infantry Brigade commander Brigadier Gen. Inocencio Pasaporte ang accomplisment report sang militar kun sa diin humalin Enero 1 tubtob Disyembre 15, 2022, may nagluntad nga 42 ka mga engkwentro.
29 ka mga New People’s Army ang napatay, anum ang nagkaladakpan, napulo ka iban pa ang nadakpan sa mga military operation kag 66 ang nagbalik sa sabak sang gobyerno.
Nagpasalig naman si Pasaporte nga ila padayunon ang epektibo nga dissemination sang Comprehensive Local Integration Program kag kolaborasyon sang mga local government units sa peace and order campaign.
Samtang, ginpresentar man sang Negros Occidental Police Provincial Office (NOCPPO) nga nagikan sa 603 ka mga focused crimes sang 2021, nagsaka ang ini sa 695 subong nga tuig.
Sa mga drug operation sang Philippine Drug Enforcement Agency (PDEA), nakapatigayon sang 678 ka mga buybust operation kun sa diin 843 ang naaresto nga indibidwal kun sa diin nakumpiskar ang 15,670 grams sang shabu kag 8,569.92 grams sang marijuana nga nagabalor sang kabug-usan nga P107.5 million.
Suno kay Governor Lacson, malipayon kag satisfied ini sa mga accomplishment sang PNP, Philippine Army kag PDEA.
Aminado ini nga nagsaka ang numero sang focused crimes sini nga tuig bangud naghalog na ang lockdowns sini nga tuig apang manageable sa gihapon ang sitwasyon.
Nagalaom naman ini nga sa kamatayon ni Communist Party of the Philippines founder Joma Sison, igakonsiderar sang bag-o nga mga pinuno sang mga rebelde ang pagbalik sa sabak sang gobyerno.
