Ginkumpirmar sang gobernador sang Negros Occidental nga ginasuguran na ang liwat nga pagbuhi sang hog industry sa probinsya.
Madumduman nga dako ang nadula sa supply nga baboy sang probinsya sang tinalikdan matapos mag-apekto ang Hog Cholera kag African Swine Fever (ASF).
Suno kay Governor Eugenio Jose “Bong” Lacson, nagsugod na ang pre-sentineling ukon ang proseso sa pagtinlo sang mga tangkal nga mahimo hamtangan sang mga paon nga baboy para sa sentineling.
Sa tion nga maayo ang mangin resulta sini, magapatigayon naman sila sang restocking kag mahimo sa masunod nga tuig mapatuman na ang repopulation sang mga baboy.
Paathag sang gobernador nga ginatinguhaan nila nga mapatuman sa madamo nga mga lugar ukon local government units (LGUs) ang proseso.
Pahanumdom sini nga indi dapat magkanya-kanya ang mga LGUs kag sundon ang ila ginplastar nga programa agud madinalag-on nga malab-ot ang target sa masunod nga tuig.
Sa pihak nga bahin, ginapasalamat naman sang gobernador nga ang mga lugar nga nahalitan sang ASF kag Hog Cholera sa probinsya ang wala na sa karun sang recorded nga mortalities.
Isa pa sa nakita sini nga maayo, amo ang pagdamo na sang barato nga lechon, nga nagapakita suno kay Lacson nga nagakabaligya na sang mga hog raisers ang mga baboy.
