Komporme ang gobernador sang Negros Occidental nga ibalik na ang nakaandan nga school calendar ukon pagsugod sang klase sa bulan sang Hunyo kag pagtakop sini sa bulan sang Marso, subong nga tuman ka init ang panahon.
Suno kay Negros Occidental Governor Eugenio Jose ‘Bong’ Lacson, pabor ini sa suggestion ni Senator Win Gatchalian nga ibalik na sa kinaandan ang school calendar.
Sa karon nga may El Niño phenomenon, tuman na gid kainit ang panahon apang bisan wala sang El Niño suno sa gobernador, mainit gid man ang panahon diri sa Pilipinas kun Abril kag Mayo.
Suno sa gobernador, mas maayo nga gamiton nalang sa iban nga katuyuan ang summer season kaangay sang sports bangud indi man maka-enjoy ang mga kabataan kun tingulan ang school break.
Suno diri, indi man makatuon sang maayo ang mga estudyante kun tuma kainit, ilabi na nga mas madamo ang classrooms nga wala sang air conditioning system.
May mga suhestyon naman nga ibalik ang online classes apang suno sa gobernador, mas epektibo ang face-to-face classes.
Subong nga hapon, magabukas na ang Western Visayas Regional Athletic Association Meet 2023 kag magatambong man si Lacson.
P14.3 million ang pondo nga ginpain sang provincial government sang Negros Occidental para sa pagpasakop sang mga atleta sa WVRAA Meet 2023.
