Nagpanawagan si Negros Occidental Governor Eugenio Jose “Bong” Lacson sa mga Negrense nga magsuksok sang face mask, ilabi na sa mga lugar nga may presensya sang haze.
Ini nga panawagan ginpagwa samtang padayon nga ginamonitor sang Environmental Management Bureau–Negros Island Region, ukon EMB-NIR, ang kahimtangan sang ambient air quality sa Bacolod City, La Castellana, kag iban pa nga lugar sa Negros Island Region, bangud sang haze nga posible may kaangtanan sa nagapadayon nga mga sunog sa Kalimantan, Indonesia.
Suno kay Lacson, ang basic nga himuon amo ang pagsuksok sang facemask ilabi nagid sa mga lugar nga may yara sang presensya ang haze.
Una naman nga panugyan sang Department of Health nga likawan ang magwa ukon magsuksok sang facemask ilabi na kun may yara sang respiratory problems agud nga maproteksyunan ang kaugalingon gikan sa haze.
